Dende TEDxGalicia temos intención de seguir a expandir o formato e os valores TED e TEDx na divulgación de ideas, coñecemento e experiencias que mercen a pena ser compartidos. Nese senso traballamos de cara ao 2012 para contar cun programa de charlas sectoriais en formato TEDx que sirvan para ampliar o alcance do evento anual, TEDxGalicia, que continuará a desenvolverse en novembro como a gran festa das ideas.

A semana pasada tivemos a honra de ser convidados a Mundos Digitales incorporando no seu impresionante programa de ponencias, dúas sesións en fromato TEDx. Aproveitamos esta ocasión para agradecer a Luis, Obdulia, Michael, Gonzalo, Miguel Ángel e Victor o seu atrevemento por preparar unha charla en formato e de contido TEDx.

Ate o momento que teñamos listas as charlas para compartilas na internet, aquí vos vai un resumo.

TEDxGalicia en Mundos Digitales

A primeira sesión tivo lugar no día adicado á arquitectura dixital. Comezou Luis Hernández, arquitecto e director do Grupo de I+D de Visualización Avanzada en Enxeñaría Civil, Arquitectura e Urbanismo (VideaLAB), que nos abriu a mente a novas posibilidades no eido do deseño. Entendendo a arquitectura como unha ferramenta para dar resposta a necesidades sociais, o camiño da arquitectura á luz dos clásicos debe seguir a dar resposta a estas necesidades sen caer en limmitacións autoimpostas.

Tras el, Obdulia Taboadela, socióloga e anterior responsable de urbanismo no Concello de A Coruña, reflexionou sobre a cidade do século XXI. Entendendo a cidade como o espazo que posibilita as relacións sociais e polo tanto que limita ou potencia determinados aspectos da sociedade, Obdulia nos propón o camiño cara unha nova concepción do espazo público.

Michael J. Brown, lidera a oficina de NAU en Berlín. Na súa charla introduciu a variable temporal no concepto de tecnoloxía para concluir que, hoxe en día, unha innovación ten éxito cando pasa de ser tecnoloxía a un elemento de uso cotiá dentro dunha mesma xeración.

O sábado, foi o momento de Gonzalo, Miguel Ángel e Victor. Gonzalo Rueda, CTO de Ilion Animation Studios, fixo un percorrido pola súa carreira pdestacando a importancia que tivo a persecución dos seus soños foi para o éxito e como esa motivación segue hoxe en cada novo proxecto no que se implica.

Miguel Ángel Fuertes, animador 3D que traballou con directores como Steven Spielberg, George Lucas, George Miller ou Ang Le entre outros, ofreceunos unha charla intimista na que a través da súa experiencia tras a perda dos seus páis conseguiu a metamorfose dun evento dramático de dúas das súas ferramentas de traballo: a creatividade e a beleza.

Para pechar esta primeira edición de TEDxGalicia@MD, Víctor M. López, socio fundador e CEO de Vodka Capital, tivo que superar a carga que deixou Miguel Ángel no escenario e o fixo cunha mensaxe que inesperadamente recolle os impulsos e motivacións presentados por Miguel Ángel e, a través dunha visión proactiva e optimista da situación de crise que estamos a vivir, trata de nos inocular o virus da responsabilidade que cada un de nos temos en permitir ou manter os status quo.

Gracias @mundosdigitales. Cando queirades, aquí nos tendes.