Descubrindo ideas galegas que merecen ser compartidas

Un dos obxectivos de cara a este ano no TEDxGalicia é o de ofrecer un maior protagonismo á audiencia. Queremos comezar dende a procura inicial das charlas, así que temos deseñado un proceso de audicións a semellanza do novo programa global lanzado por TED.

Como proceso de expansión do TEDxGalicia, a intención destas audicións é únicamente a de continuar a descubir ideas galegas que merezan ser compartidas. Non se trata dun concurso e non é o obxectivo principal desta sesión o de seleccionar ás e aos ponentes do próximo ou futuros TEDxGalicia.

O que buscamos?

Inventos – Innovacións co potencial de cambiar Galicia e, porque non o mundo.

Educación – Métodos salientables para compartir coñecemento.

Prodixios – Xóvenes talentos listos para despuntar.

Artistas – Tratando de presentar o seu traballo de maneiras diferentes, non simplemente falando del.

Representacións – Música, baile, humor,… ou algo totalmente diferente.

Sabiduría – Sabiduría que o mundo precisa de quen o ten aprendido polo camiño difícil.

Entusiasmo – Presentacións con paixón das ideas ou iniciativas compartidas.

Axentes de cambio – Traballando polo que importa facendo de Galicia un lugar mellor.

Contadores de historias – Intensos, orixinais, cargados de sentido e cunha capacidade especial para conectar coa audiencia.

Provocación – Ao redor dunha potente idea que mereza ser compartida.

En qué consistirá o proceso

Abrimos hoxe un prazo de preinscrición a través deste pequeno formulario web. Atendendo á natureza dos TEDx, recomendase encarecidamente ás e aos candidatos enviar un pequeno video de presentación (máximo 30 segundos) a audicions@tedxgalicia.com.

Recibiremos solicitudes ate o 30 de abril e na semana seguinte agardamos poder dar a primeira lista de participantes nas Audicións do TEDxGalicia. Nesta primeira edición agardamos seleccionar a unhas 15 persoas que serán convidadas a un evento no que disporán nun tempo máximo de 6 minutos para presentar a súa idea.

O lugar e a data das audicións será confirmado en función da participación e será un evento aberto ao público. Entre as e os asistentes serán convidadas un número de persoas ás que se lles pedirá unha valoración sobre distintos aspectos das presentacións. Con estes resultados valoraremos o encaixe no TEDxGalicia e se considerará a oportunidade de que algunha poida formar parte de futuras edicións.

Tamén, na medida das nosas posiblidades reais, trataremos de incorporar ás presentacións cun maior potencial nos procesos de acompañamento e preparación que temos preparados para as e os poñentes do TEDxGalicia 2012.