TEDxGalicia 2015 – CIDADE DA CULTURA

Nesta edición o TEDxGalicia regresa a Compostela e o fai á Cidade da Cultura na planta -1 do Museo. Grazas á implicación do Centro de Emprendemento de Galicia (CEM) todo teñen sido facilidades para a organización. Da súa man temos algunhas sorpresas para vos compartir na mañá do vindeiro 19 de setembro.

O reto que agora afrontamos é o de facermos deste maxestuoso espazo un lugar humilde e acolledor no que un grupo de persoas comúns volvan demostrarnos que as ideas, iniciativas e o movemento cultural, socioeconómico e identitario de Galicia está nas súas xentes.

A nosa sede

O  Museo Centro Gaias é un dos edificios máis singulares e con máis posibilidades de uso da Cidade da Cultura, que aspira a converterse no centro expositivo de referencia de Galicia.

A cultura, na súa concepción máis ampla e inclusiva, será a protagonista deste espazo que integrará todas as manifestacións artísticas, humanísticas, de creatividade e coñecemento.

O noso partner

O Centro de Emprendemento (CEM) da Cidade da Cultura ponse ao servizo dos emprendedores para converter o seu soño nunha forma de vida.

A través dun programa de titoría e acompañamento na posta en marcha de modelos de negocio exitosos, identificación de novas oportunidades e maduración de ideas empresariais, asesoría financeira, networking e showrooms, o CEM adáptase ás túas necesidades.