A través da súa aposta por unha educación ao servizo do alumnado que utilice todos os medios tecnolóxicos á nosa disposición hoxe en día, Manel fai unha reflexión integral de como debería ser para el a educación chegando á conclusión de que interese debería ser axudar a nenas e nenos a que poidan ser Seres Sentipensantes.

Manel é un deses mestres máis preocupados en que o alunado aprenda que en ensinar.

Especialmente preocupado pola alfabetización dixital considera que hoxe é importante dominar algo máis que a letra impresa e o lapis. É preciso coñecer a imaxe, o son, a cor, as formas, o movemento… e saber combinar todo isto nunha mensaxe de alcance global.

Para Manel, a creatividade é poñer a imaxinación en funcionamento para un obxectivo a conseguir, algo que crear, algo que cambiar, algo que mellorar. Para que a creatividade poida funcionar é necesario contar con espazos de risco e usar as linguaxes adaptadas aos tempos que nos toca vivir.