Este ano comezaremos cedo a vos propoñer opcións de implicación para o TEDxGalicia 2016, pero antes queremos compartir unhas xeneralidades como por exemplo o tema esta edición que será: De que está feito o futuro?

Agardamos poder presentar intervencións que nos permitan repensar as nosas ideas de como se chega ao futuro e a responsabilidade que temos no presente dese mesmo futuro así como os impactos do pasado. Trataremos de chegar aos elementos fundamentais que desde o pasado e hoxe mesmo, están xa a configurar ese tempo que está por vir… e todo isto coa nosa inquedanza básica non resolta: estamos seguros de que existe o futuro?

Levamos tempo a traballar en cal pode ser a experimentación do 2016 e entre outras cousas veremos que podemos facer co feito de que esta sexa a primeira edición que afrontamos o TEDxGalicia en verán. Certo é que o verán galego é coma nos mesmos e polo tanto non está nada claro que tempo vai haber na data do evento, pero tentaremos sacar o evento do interior dunha sala.

Faremos un importante esforzo porque os contidos e as ideas estén superen ás formas de presentalas e, sobre todo que teñamos múltiples perspectivas de persoas das que probablemente non escoltamos falar. Para iso é importante sempre contar con axuda e como mostra da implicación que manteñen co TEDxGalicia as persoas que pasaron pola “pastilla vermella”, nesta edición teremos dúas aportacións de contidos especiais xestionadas por sendas persoas que tiveron no seu día unha actuación destacable na súa edición.

Buscaremos tamén como facer o máis entretido posible todo o día do evento e, para facilitar que o contacto non se produza de ano en ano teremos diversas actividades nos meses previos das que xa vos iremos informando.

Tamén estudamos as vosas valoracións de anos pasados e sabemos que temos moito por facer, pero, xa sabes, se pensas que podes aportar algo ao evento para facer que mellore, non dubides en escribir a 2016@tedxgalicia.com. Nos seguiremos a facer o que poidamos 😉